Auðir seðlar og lýðræði

Fyrir sumar kosningar hef ég ekki getað fundin neinn flokk sem ég hef verið sáttur við. Þá hefur komið fyrir að ég hef skilað auðu eða beitt útstrikunum einstakra frambjóðenda. Þess mun þó ekki gerast þörf fyrir þessar kosningar. 

Við vitum að slík kosning hefur hverfandi áhrif á úrslitin, hún er einfaldlega tjáning á viðhorfi. Hugtakið lýðræði er orðið innihaldsríkt hugtak og merkir ekki aðeins að meirihlutinn ráði, eða sé a.m.k. látinn halda það, lýðræði felur einnig í sér skoðana- og tjáningarfrelsi í huga mínum. Það er jafnvel meira virði en valdið sjálft og þess vegna get ég með góðri samvisku kosið flokk sem hætta er á að fái ekki það lágmark sem þarf til að fá þngmenn.

Af þessari ástæðu er það lítilsvirðing við kjósendur sem gera sér ferð á kjörstað til þess að skila auðu að geta þeirra ekki sérstaklega heldur spyrða þá við annan hóp sem gerir ógilt. Við heyrum oft sagt frá þessu þannig að auðir seðlar og ógildir hafi verið svo og svo margir. Sá meðvitaði en fámenni hópur sem skilar auðu er að senda skilaboð og á ekki mikið sameiginlegt með þeim sem kunna ekki að fara eftir leiðbeiningum við kosningar eða brjóta reglur.